Klubi i Volejbollit Shkëndija është në prag të shënimit të një momenti historik – 50-vjetorin e themelimit, dhe për këtë rast të veçantë, nostalgia ka marrë jetë në formën më të bukur: rikthimin e veteranëve në parket.
Nën drejtimin e legjendës së volejbollit tetovar, trajnerit dhe profesor Miftar Ziberi, ish-lojtarët që dikur përfaqësonin me krenari ngjyrat kuqezi janë rikthyer për të përgatitur ndeshjen reviale kundër veteranëve të Kosovës, e cila do të zhvillohet të shtunën (30 nëntor). Stërvitjet kanë nisur disa ditë më parë dhe atmosfera është mbushur me emocion, kujtime dhe shpresën për të dhuruar një paraqitje që nderon këtë jubile të madh.
Në parketin e palestrës, një pas një, emrat e njohur të volejbollit tetovar kanë rifilluar të godasin topin dhe të kujtojnë ditët kur Shkëndija ishte sinonim i dominimit dhe krenarisë. Agon Ibraimi, Mensur Hamza, Pellumb Vela, Abdush Demiri, Faton Arifi, Durim Luma, Naser Qamili, Besim Rexha, Habil Ajeti, Besian Reka dhe Zelfi Baftijari janë ndër ata që u kthyen në parket për të rigjallëruar frymën e skuadrës së dikurshme, duke përjetuar edhe një herë emocionet e fushës dhe përkushtimin që i ka bashkuar ndër vite.
Ndërkohë, profesor Miftar Ziberi, simboli i suksesit të Shkëndijës dhe volejbollit në Tetovë, i udhëheq me pasion dhe profesionalizëm ish-lojtarët, duke sjellë në stërvitje jo vetëm përgatitje fizike, por edhe kujtime të papërsëritshme nga një epokë e artë e klubit.
Stërvitjet do të vazhdojnë deri të premten, ndërsa të shtunën veteranët e Shkëndijës do të përballen me ekipin e veteranëve të Kosovës në një ndeshje reviale që premton të jetë një moment i veçantë për të gjithë të pranishmit. Për këta volejbollistë, rikthimi në parket është më shumë se një përgatitje – është një festë e vërtetë e sportit, shoqërisë dhe respektit për traditën.
Me këtë angazhim dhe përkushtim, veteranët e Shkëndijës po dëshmojnë edhe një herë se shpirti sportiv nuk ka moshë, dhe kujtimet e lavdisë në volejboll mbeten gjithmonë të gjalla.