Gazeta spanjole “AS” raporton, se trajneri spanjol Roberto Moreno i ka thënë “po” klubit të ligës elitare ruse të Sochit, duke hequr dorë nga oferta që e mori nga Federata e Futbollit të Kosovës, për ta drejtuar kombëtaren e “Dardanëve”.
Sipas medias iberike, Morenon e bindi më shumë projekti i klubit rus, sesa ai i Kosovës, apo i klubit turk, Adana Demirspor, të cilët po ashtu kishin shprehur interesim për të.
Madje, ditë më parë qarkulloi një fotografi, ku shiheshin në një darkë në Stamboll presidenti i FFK-së, Agim Ademi dhe trajneri Moreno.
Sipas “AS”, trajneri spanjol ka rënë dakort me pronarët e Socchit, të zhvillojë një projekt ambicioz, pavarësisht se skuadra ruse renditet në fund të klasifikimit. Ai pritet të jetë trajneri i katërt i Sochit në këtë sezon, pas Jojlov, Tochilin dhe Kliuyev.
Sochi është një skuadër në pronësi të Boris Rotenberg, njëri nga njerëzit më të pasur dhe më të fuqishëm në Rusi.
