Kandidatura e përbashkët e Spanjës dhe Portugalisë në Botërorin 2030 ka një mysafir surprizë të minutës së fundit. Sipas ‘The Times’, Ukraina ‘i bashkohet’ këtij propozimi dhe mund të marrë pjesë në organizimin e Kupës së Botës. Ukraina do të kishte një pjesëmarrje simbolike në atë turne, por emri i saj do të bashkohet me atë të dy vendeve të Gadishullit Iberik.
Sipas ‘The Times’, propozimi është miratuar tashmë nga Zelensky dhe qeveritë kombëtare të Spanjës dhe Portugalisë, që do të thotë se Ukraina, pavarësisht se aktualisht është në luftë, do të presë një nga grupet e turneut. Portugalia ka tre stadiume për turneun në fjalë dhe Spanja do të kontribuonte me njëmbëdhjetë, sipas vlerësimeve fillestare. Tetë vendet spanjole nuk do të preken nga kjo shtesë ukrainase.
Të mërkurën, kandidatura iberike për Botërorin 2030 do të bëjë një hap përpara me vizitën e presidentëve të Federatës Portugeze, Fernando Gomes dhe atë të spanjollit, Luis Rubiales në selinë e UEFA-s në Nyon. Arsyeja e vizitës në qytetin zviceran nuk është tjetër veçse prezantimi i partnerit të ri të kandidaturës, që nuk është askush tjetër veçse federata e Ukrainës, siç raporton ‘The Times’.
Pesha e kandidaturës do të vazhdojë të bjerë mes Spanjës dhe Portugalisë, por gjesti simbolik kërkon t’i shkelë syrin një populli që ka vuajtur ashpërsitë e pushtimit rus që nga marsi i kaluar. Logjikisht, gjithçka i nënshtrohet përfundimit të luftës dhe rindërtimit të një vendi të rrethuar nga Putini dhe ushtria e tij. Ukraina do të ketë një rol simbolik dhe në të njëjtën kohë kërkues.
Ukraina organizoi Kampionatin Europian 2012 së bashku me Poloninë, duke demonstruar një nivel të lartë organizativ, diçka që u përsërit edhe në finalen e Champions League 2018 të zhvilluar në Kiev.
Aleksander Ceferin , presidenti i UEFA-s, ka bërë gjithmonë të qartë ekzistencën e dy kushteve për të marrë mbështetjen e 55 federatave: ekzistencën e një kandidature të vetme europiane dhe që vendi të mos ndahet me një kontinent tjetër. Dorëheqja angleze i ka lënë të hapur rrugën kandidaturës iberike.
Ditët e fundit është shfaqur mundësia që Greqia të ndajë një projekt me Arabinë Saudite dhe Egjiptin, një ide që nuk do të ketë mbështetjen e UEFA-s, pasi do të duhej të luhej sërish në dimër. Kandidatura që paraqitet si rivale është ajo amerikano-jugore e formuar nga Argjentina, Uruguai, Paraguai dhe Kili.
Kupa e Botës 2026 do të luhet në Shtetet e Bashkuara, Kanada dhe Meksikë. Zgjedhja përfundimtare e vendit nuk do të jetë deri në vitin 2024.
