Stefano Pioli ishte një hap larg stolit të Al Ittihad, por brenda klubit saudit shpërtheu kaos. Siç raporton Le Parisien, në fakt, ylli i skuadrës, Karim Benzema, e ka kundërshtuar me vendosmëri ardhjen e ish-trajnerit të Milanit.
Presidenti Laoy Nazer, i cili kishte zgjedhur trajnerin nga Parma, së bashku me drejtorin sportiv Ramon Planes, i ka dorëzuar dorëheqjen Ministrisë së Sportit, e cila tani do të duhet të vendosë nëse do ta pranojë atë.
Gjithçka dukej se ishte bërë, deri në atë pikë sa që tashmë kishin nisur të hipotezoheshin lëvizjet e transferimit te Al Ittihad i Stefano Piolit, të cilat do të ishin fokusuar ndër të tjera edhe tek lojtari i Interit, De Vrij.
Por një ish-fitues i “Topit të Artë”, ylli i padiskutueshëm, e kundërshtoi qartë: Karim Benzema, pas një sezoni të parë mjaft zhgënjyes arab, ka ide të tjera për stolin e klubit të tij. Dhe një klauzolë në kontratën e tij duket se e lejon atë të ketë fjalën në zgjedhjen e trajnerit.
I pa bindur nga Pioli, ish-lojtari i Real Madridit do të donte Christophe Galtier, ish-trajneri i PSG-së, i cili ka një marrëdhënie të shkëlqyer me Benzema dhe Kante.
Qëndrimi i Benzemas, megjithatë, shkaktoi një tërmet brenda klubit, duke qenë se presidenti dhe drejtori sportiv praktikisht kishin mbyllur tashmë marrëveshjen me Piolin. Por ata nuk e kishin marrë parasysh yllin e tyre, i cili kërkon një ekip konkurrues të aftë për të luftuar për titull.
