Shkëndija të enjten me fillim në orën 19:00 luan ndeshjen e parë të raundit të tretë eliminator të UEFA Conference League, ndërsa në prag të kësaj ndeshje, para gazetarëve në konferencë për shtyp ka folur trajneri, Artim Shaqiri.
Artim Shaqiri:
“Ndeshja ndaj AIK-ut është më ndryshe nga dy raundet paraprake. Normalisht që kundërshtari duhet të vlerësohet në maksimum, e kam thënë edhe më herët se AIK është favorit, por favorit ngelet vetëm në letër sepse kur futemi në fushë e respektojmë vetëm veten tonë. Kemi ardhur këtu që të luajmë një ndeshje të bukur dhe të marrim një rezultat pozitiv. Do të mundohemi që të nderojmë edhe tifozët dhe Ballistët të cilët kanë bërë një rrugë të gjatë për të përkrahur ekipin. Shpresojmë të realizojmë planin dhe të kualifikohemi në raundin tjetër”.
“Kemi pasur shumë kohë të shkurtër për të bërë analizën për këto ndeshjet evropiane kur çdo javë ka ndeshje. Por besoj se analizën që e kemi bërë do të na mjaftojë. Kemi marrë informacione gjithandej, falë edhe miqve që i kemi këtu në Suedi, dhe duke marrë parasysh gjithë këto besoj se edhe në fushën e blertë do të kemi paraqitje të mirë”.
“Shtylla më e fortë e AIK-ut është sulmi, mesiguri se nuk është e lehtë që kundër një skuadre si Vorskla të shënosh 4 gola në 2 ndeshje. Në ndeshjen e parë pranuan 3 gola, që tregon se pika e tyre e dobët është mbrojtja. Por ne duhet ta bëjmë punën tonë, do të japim më shumë se sa është e nevojshme, më tepër se në dy raundet paraprake. Na mbetet neve që të dëshmojmë veten dhe të marrim atë për të cilën kemi ardhur, e ajo është rezultati pozitiv dhe arritja e qëllimit”.
