Klubi tetovar nisi në mënyrën më të mirë të mundshme garat në Ligën Kombëtare të boksit amator në Shtip, duke regjistruar maksimumin e fitoreve, 4 ndeshje, 4 triumfe.
Boksieri debutues Elon Demir la përshtypje shumë të mirë me një paraqitje të fortë, ndërsa Enver Havziju dominoi plotësisht përballjen e tij. Ferid Arifi zhvilloi një duel cilësor dhe arriti fitore të merituar, pavarësisht avantazhit të kundërshtarit nga Shtipi që kishte mbështetjen e publikut vendas.
Mbrëmjen e vulosi Erion Seiti, i cili ndaj një rivali me përvojë triumfoi me KO në raundin e dytë, duke dhënë një sinjal të qartë për ambiciet e klubit këtë sezon.
Boxclub Shkëndija No Limit e nis kampionatin me hap kampioni dhe tashmë sytë janë drejt sfidës së radhës në xhiron e dytë në Delçevë.
