Shkëndija-Shkupi është kryefjala e fundjavës në futbollin vendor. Dy ekipet më të mira të vendit në vitet e fundit përplasen mes veti në duelin e parë të sezonit të ri, derisa rivaliteti i rritur kohëve të fundit paralajmëron ndeshje me shumë nxitje e emocion.
Dy ekipet nuk kanë nisur si duhet sezonin e ri, duke lëshuar pikë në ndeshje të caktuara, duke lënë Struga Trim&Lum të shkëputet në krye të renditjes falë startit perfekt me 7-të fitore në 7-të ndeshje.
Prandaj ky duel përveç rivalitetit ka vlerë të madhe për dy ekipet, sepse fituesi mban hapin me Strugën dhe në këtë drejtim ka folur mbrojtësi i Shkëndijës, Klisman Cake. Në prononcimin e tij pas fitores 3:0 ndaj Karaormanit në 1/16 e finales së Kupës së Maqedonisë, Cake ka drejtuar vëmendjen kah dueli me Shkupin.
“Është një ndeshje mjaft e bukur dhe e vështirë për ne. Premtoj unë dhe gjithë ne si ekip se do të japim maksimumin dhe tre pikët të ngelin në Tetovë, aty të festojmë me ‘Ballistët’”, është shprehur Cake.
