Lëvizje surprizë në merkato, futbollisti me origjinë shqiptare, Pajtim Kasami, do të transferohet te skuadra greke e Olimpiakosit. Lajmi është konfirmuar nga gazetari i njohur italian, Fabricio Romano, i cili bën me dije se palët kanë arritur një marrëveshje, teksa Kasami do të kalojë si futbollist i lirë tek skuadra prestigjioze greke.
Romano gjithashtu njofton se futbollisti ka përfunduar testet mjekësore te skuadra e Olimpiakosit. Mbetet të shihet se kur do vije zyrtarizimi nga klubit. Kasami do të jetë shok skuadre me brazilianin Marselo, Hames Rodrigue, dy futbollistë që në të kaluarën kanë qenë pjesë e Realit.
Kasami e ka veshur edhe në të kaluarën fanellën e Olimpiakosit, bëhet fjalë për sezonet 2014-2017, ku u aktivizua 44 ndeshje dhe shënoi 6 gola.
30-vjeçari shqiptar ka pasur një karrierë të bujshme deri tani, ku ndër klubet te të cilat është transferuar kanë qenë Fulhami, Nottingham Foresti, Baseli, Sioni e Palermo. Në sezonet e fundit mesfushori ishte pjesë e Bazelit.
