Referet nga Maqedonia e Veriut, Ivana Projkovska, Vjollca Izeiri, Elena Sokolevska-Ilievski dhe referja e katërt Irena Velevackovska mbrëmë kanë udhëtuar drejt Spanjës, pasi janë caktuar që ditën e enjte të ndajnë drejtësinë në ndeshjen e Ligës së Kampionëve në kategorinë e femrave ndërmjet Barcelonës dhe PSV Eindhoven Vrouwen, që do të zhvillohet në stadiumin “Johan Cruyff” me fillim në orën 17:00.
Për katër referet më të mira të vendit tonë dhe në veçanti për FFM-në është një nder i veçantë, pasi bëhet fjalë për katër vajza që kanë autoritet në ndarjen e drejtësisë në futboll.
Arbitret Ivana Projkpovska , Elena Sokolevska-Ilievski, Vjollca Izeiri dhe Irena Velevackovska vite me radhë janë në skenën e futbollit të vendit tonë, qoftë si futbolliste apo tashmë si refere në futbollin vendor dhe atë ndërkombëtarë.
Për shqiptaren Vjollca Izeiri nga Gostivari ky delegim është dëshmi shtesë për ngritjen e nivelit të saj, duke arritur të bëhet ndër arbitret femra më të mira në rrafshin mbarëkombëtar. Deri tani Izeiri ka referuar në më shumë se 50 ndeshje ndërkombëtare, ndërsa të enjten do të ketë nderin që të ndaj drejtësi edhe në impijanitin e madh që mban emrin e legjendës “Johan Krojf”.
