Presidenti i Federatës Ndërkombëtare të Futbollit (FIFA), Gianni Infantino, ka dënuar konfliktin e tifozëve që vonoi fillimin e ndeshjes mes Brazilit dhe Argjentinës në Rio de Zhaneiro.
“Nuk ka absolutisht vend për dhunë në futboll, në apo jashtë fushës. Ngjarjet si kjo nuk kanë vend në sportin apo shoqërinë tonë ,” shkroi Infantino në llogarinë e tij në Instagram në anglisht, spanjisht dhe portugalisht.
Përpara se t’i shkaktonin brazilianëve humbjen e parë në fushën e tyre në histori në kualifikueset për Botërorin (1:0), argjentinasit u rikthyen në dhomat e zhveshjes pasi kënduan himnin kombëtar, teksa në tribuna shpërtheu sherri.
Trazirat filluan kur tifozët e Brazilit dhe Argjentinës u përleshën pas një prej incidenteve në Maracana gjatë himnit kombëtar, duke bërë që policia të përdorte shkopinjt mbi tifozët mysafirë.
Disa tifozë thyen karriget dhe qëlluan ndaj policisë, ndërsa të tjerë vrapuan në fushë për të shmangur turmën.
Futbollistët argjentinas dhe disa pjesëtarë të skuadrës braziliane u përpoqën të qetësonin situatën, ndërsa portieri Emiliano Martinez tentoi t’i vidhte një shkop policëve.
Lojtarët shkuan në dhomat e zhveshjes kur policia mblodhi tifozët argjentinas në një pjesë të veçantë të tribunës dhe ndeshja filloi me gjysmë ore vonesë.
“Pasi i nxorrën jashtë, të gjithë lojtarët, tifozët, stafet stërvitore dhe gjyqtarët duhet të jenë të sigurt për të luajtur dhe shijuar futbollin dhe u bëj thirrje autoriteteve kompetente të sigurojnë që ky parim të respektohet në të gjitha nivelet”, përfundoi Infantino .
