Një ditë pasi pozicioni dominues i UEFA-s dhe FIFA-s u vu në pikëpyetje nga vendimi i Gjykatës Evropiane të Drejtësisë, i cili vendosi në qendër të diskutimeve projektin e Superligës, Barça pa një kërcënim të pabesueshëm dje.
Media gjermane “Welt” në fakt ka bërë të ditur se klubi blaugrana do të përballet me një rrezik real të përjashtimit nga Champions League, nga sezoni i ardhshëm dhe për sezonet në vijim.
Sipas botimit gjerman, arsyeja është fakti se UEFA i konsideron të ardhurat sportive vetëm në kuadër të “fair play”-it të saj financiar. Levat e famshme të aktivizuara nga Barça, që e lejojnë atë të shfaqë një fitim neto prej më shumë se 300 milionë euro në bilancin e saj të fundit, nuk do të merren parasysh.
Një kërcënim i madh, nëse do të konfirmohej, që gjithsesi nuk duket se e shqetëson shumë klubin katalanas. E pyetur nga Mundo Deportivo, Barça siguron se nuk ka asnjë gjurmë të një rreziku të mundshëm sanksioni dhe është veçanërisht e habitur kur sheh këtë informacion të dalë, pikërisht pak orë pas vendimeve evropiane që forcuan pozicionin e saj kundër UEFA-s në dosjen e Superligës.
